Қазақстанның Қаржы вице-министрі Ержан Біржанов үкіметте өткен брифингте жеті блогерге қатысты салықтық тексеру шаралары жүріп жатқанын мәлімдеді. Алдын ала мәлімет бойынша, оларға қосымша есептелген салық сомасы 10 миллион теңгеден асады, деп хабарлайды Qaz365.kz.
Вице-министр салық құпиясына байланысты тексеріліп жатқан тұлғалардың аты-жөнін атай алмайтынын жеткізді. Дегенмен, жыл басынан бері мемлекеттік кірістер органдары блогерлердің табысын бақылау бойынша ауқымды жұмыс атқарған. Жалпы алғанда, 854 блогерге табысын төмендетіп көрсеткені туралы 1586 хабарлама жіберілген. Бұл хабарламаларда көрсетілген жасырылған табыстың жалпы сомасы 72 миллиард теңгені құрайды.
Мұндай бақылау шараларының нәтижесінде 622 автор өз декларацияларын қайта қарап, табыстарын 18,3 миллиард теңгеге арттырған. Осының есебінен бюджетке қосымша 1 миллиард теңгеге жуық салық төленді. Сондай-ақ, тағы 600 миллион теңгені өндіру туралы нұсқамалар берілген.
Қаржы министрлігі әлеуметтік желілерде жарнамамен айналысатын және табыс табатын азаматтарды салық міндеттемелерін адал орындауға шақырады. Ведомство цифрлық платформалар арқылы түсетін табыстарды бақылау жүйесі алдағы уақытта да күшейтілетінін ескертті.