Қарудан оқ атылып, Отан қорғаушыларға құрмет көрсетілді
Көкшетауда Ұлы Жеңістің 81 жылдығына арналған салтанатты іс-шара өтті. Мерекенің негізгі орталығы «Мәңгілік алау» мемориалы болды. Мұнда облыс басшылығы, депутаттар, қоғам өкілдері және қала тұрғындары жиналып, ерлікпен қаза тапқан батырларды еске алды, деп хабарлайды Qaz365.kz.
Салтанатты жиын Ұлы Отан соғысы батыры, жерлесіміз Рақымжан Қошқарбаевқа арналған әндердің орындалуымен басталды. Бұл музыкалық шығармалар оның және барлық майдангерлердің өшпес ерлігін айшықтап, жиынға ерекше рух берді.
Рәсім бір минут үнсіздікпен жалғасып, майданда қаза тапқан жауынгерлер рухына тағзым жасалды. Одан кейін қарудан оқ атылып, Отан қорғаушыларға құрмет көрсетілді. «Мәңгілік алауға» гүл шоқтарын Ақмола облысының әкімі Марат Ахметжанов қойып, оған депутаттар, құқық қорғау органдарының басшылары, күштік құрылым өкілдері мен әскери қызметкерлер қосылды. Бұл шара тарихи жадыны сақтау жолындағы бірлікті айқындады.
Гүл қою рәсімінен кейін қатысушылар өңірдегі өзге де қасиетті орындарға барды. «Жұлдыз» мемориалына, Талғат Бигелдинов пен Мәлік Ғабдуллин ескерткіштеріне гүл шоқтары қойылып, батырлардың ерлігіне тағзым жасалды.
Облыстық ардагерлер кеңесінің төрағасы Ермек Нұғыманов бұл күннің маңызын атап өтіп, жастардың көптеп қатысуы ұрпақтар сабақтастығының үзілмегенін көрсетті.
Мерекелік көңіл-күй қала көшелеріндегі мәдени бағдарламалармен жалғасты. «Жағалау» бағыты бойында тұрғындарға арналған тақырыптық алаңдар ұйымдастырылып, шығармашылық ұжымдар концерттік қойылымдар ұсынды. «Синема» кинотеатры маңында «Шабыт» ансамблі өнер көрсетсе, Шоқан Уәлиханов ескерткіші жанында «Шаңырақ» хоры патриоттық әндер шырқады. Ал «Ақ желкен» аумағында әскери шатырлар тігіліп, музей экспозициялары мен кино көрсетілімдері өтті.
Ақмола облысы Қорғаныс істері жөніндегі департаментінің басшысы Марғұлан Шағиев өңір тұрғындарын Жеңіс күнімен құттықтап, бұл датаның барлық қазақстандықтар үшін айрықша мәнге ие екенін атап өтті. Оның айтуынша, Жеңіс үлкен сынақтар мен ауыр шығындар арқылы келгендіктен, майдангерлер мен тыл еңбеккерлерінің ерлігі ұрпақтан ұрпаққа жеткізілуі тиіс. Сондай-ақ ол 9 мамырдың әр буынды біріктіретін ерлік, табандылық және отансүйгіштік символы екенін ерекше айтты.
Мерекенің қорытынды бөлігі «Жағалау» сахнасындағы ауқымды концерттік бағдарламаға ұласты. Жеңіс күніне арналған іс-шаралар Ақмола облысының барлық аудандарында жалғасып, халықты ортақ тарих пен ерлік рухы төңірегіне біріктірді.