Бұл туралы Алматы облысының прокуратурасы мәлімдеді
Әлия мен Болат Назарбаевтардың Алматы маңындағы жерлері мемлекет меншігіне қайтарылды, деп хабарлайды Qaz365.kz.
Бұл туралы Алматы облысының прокуратурасы мәлімдеді.
Сәуірдің 13-і күні облыс прокуроры Берік Адамовтың төрағалығымен жер заңнамасын сақтау мәселелері бойынша алқа отырысы өтті. Алқа отырысында жерді тиімді пайдалану, сондай-ақ заңсыз алынған жерлерді қайтару тақырыптары талқыланды.
Облыстық қадағалау органында олар екі мың гектардан астам жердің сот шешімімен мемлекет меншігіне қайтарылуын қамтамасыз етті. Учаскелер Алматы облысының Жамбыл және Қарасай аудандарында орналасқан. Бұрын олар Әлия мен Болат Назарбаевқа тиесілі болған.
«Жамбыл ауданы әкімдігінің 2012 жылғы 21 желтоқсандағы және 2013 жылғы 15 сәуірдегі қаулыларымен А.Н. Назарбаеваның өкілі болып табылатын «Жандану» шаруа қожалығына жер учаскелері жалға берілген. Ал, кадастрлық іс құжаттарында жалға беру шарттары жоқ. Аудан әкімдігінің жауабына сәйкес, А.Н. Назарбаеваның атынан «Жандану» шаруа қожалығымен аталған жерлерге жалға беру шарты жасалмаған. Кейіннен жер телімдері төрт бөлек учаскеге бөлінген. Бұл учаскелер «Жандану» ҚХ-на жеке меншік құқығымен берілген. Содан кейін жер телімдері біріктіріліп, оларға бір мемлекеттік акт жасалып, кадастрлық нөмір берілген. Жалпы көлемі – 445 га, жер телімінің мақсатты – егіншілік. Прокуратура жер заңнамасын бұзу фактілері орын алды деп есептейді", – делінген сот қаулысында.
Болат Назарбаевтың жерлеріне келсек, іс материалдарына сәйкес, 2016 жылдың 13 шілдесінде Қарасай ауданы әкімдігінің қаулысымен «Айсам и Ко.Лтд» жауапкершілігі шектеулі серіктестігіне Үшқоңыр ауылдық округінде орналасқан 1485 га жер телімі жалға берілген.
«Содан кейін, 2020 жылдың 7 шілдесінде «Aisam and Co.Ltd» ЖШС (қазіргі «QazAgroCentre» ЖШС) мемлекеттік қайта тіркеуден өткен. Мұнда бастапқы құрылтайшысы – Сатыбалды Қайрат, қазіргі уақытта – Назарбаев Болат Әбішұлы. Осыдан кейін 2016 жылдың 24 тамызында аудандық жер қатынастары бөлімі мен «Айсам энд Ко ЛТД» ЖШС арасында жерді жалға беру шарты, мемлекеттік акт жасалған. Облыс прокуроры жер телімі серіктестікке жер заңнамасының талаптарын бұзумен берілген деп есептейді. Берілген жер учаскесі Қарасай ауданында орналасқаны және Алматы қаласымен шектесетіні көрсетілген. Оны пайдалану тәртібін Үкімет белгілейді. Сонымен қатар, жер учаскесіне құқық беру туралы жергілікті атқарушы органның шешімінен кейін жерге орналастыру жобасы әзірленіп, бекітілді», – делінген ақпаратта.
