Қалалық білім бөлімі түсініктеме берді
Қызылордада балабақшада ұл баланы өзімен жасты бүлдіршіндердің ұрғаны анықталды, деп хабарлайды Qaz365.kz.
Әлеуметтік желіде баланың анасының шағымы жарияланды.
Анасының сөзінше, облыс орталығындағы «Аяла-Жан» балабақшасында тәрбиеленіп жатқан баласының ерні жырылып, жарақат алған. Мекеме камерасынан қараған сәтте ұл балаға бір топ бала жабылғаны көрінген. Жамбасынан теуіп, басы мен бетінен ұрған.
Аталған оқиға жөнінде Қызылорда қалалық білім бөлімі түсініктеме берді.
«Қалалық білім бөлімі аталған балабақшаға зерделеу жұмыстарын жүргізетін болады. Мәлімет қосымша хабарланады», - делінген хабарламада.
Қызылорда қалалық полиция басқармасы бұл мәселеге байланысты тиісті жұмыстар жүргізіп жатқаны айтылды.
«18 қаңтарда әлеуметтік желіде жарияланған «Аяла Жан» балабақшасында болған оқиға жөніндегі жарияланым басқарманың ақпараттарды есепке алу кітабына тіркелді. Ол бойынша құжаттар жинақталып, Қызылорда облысы білім басқармасына тиісті шешім қабылдау үшін жолданады», - деді полиция басқармасында.
