Облыс әкімі Майқайыңдағы апаттан қаза болғандардың жақындарына қандай көмек көрсетілетінін айтты
Майқайыңдағы апаттан қаза болған құтқарушылардың отбасыларының несиесі кешіріледі. Сақтандыру өтемақысын төлеу де қарастырылады. Бұл туралы Павлодар облысының әкімі Асайын Байханов Facebook-тегi парақшасында жазды, деп хабарлайды Qaz365.kz.
Жұмыс беруші коммуналдық қарыздарды да өтемек.
«Сонымен қатар қаза болған жандардың отбасыларына кәмелетке толмаған балалардың болуы мен олардың жасына байланысты кәсіби әскерилендірілген авариялық-құтқару қызметтерінің республикалық орталық штабынан 5-10 жыл үшін орташа айлық жалақы мөлшерінде сақтандыру өтемақысы беріледі», – деп жазды әкім.
Оның айтуынша, «Майқайың-алтын» АҚ бұған дейін бөлген қаражатын бірнеше есеге арттырады. Ал жұмыс беруші қаза тапқандардың отбасыларының несиелері мен коммуналдық қарыздарын өтеуді өз мойнына алады.
