Ақтөбе қаласында жергілікті мәслихат депутаттығына кандидаттың үгіт-насихат плакатындағы сөз қате аударылған болып шықты
Ақтөбе қаласында жергілікті мәслихат депутаттығына кандидаттың үгіт-насихат плакатындағы сөз қазақшаға қате аударылған болып шықты, деп хабарлайды Qaz365.kz.
Балмағамбетова Айзада Нұрланқызы – Ақтөбе қаласындағы «Фонд помощи продуктовая корзина» қайырымдылық қорының директоры және негізін қалаушы. No7 сайлау округі бойынша Ақтөбе облыстық мәслихатының депутаттығына кандидат болып тіркелген.
Үміткердің «Мен үнсіз қалмаймын» деген ұраны «Мен үндемеймін» деп аударылған. Қате аударма бірден Facebook қолданушылары арасында талқылана бастады.
Ерлан Оспан плакаттағы жазуды “Google Translate” арқылы аудара салғанын көрсеткен.
Тағы да бір Facebook қолданушысы Шалқар Нұрсейітов Орталық сайлау комиссиясынан кандидатқа “Ең шыншыл кандидат” куәлігін беруді сұраймын” деп келемеждесе, Владислав Тен мұны әдейі жасалған әрекет деп есептейді.
“Менің ойымша ҮНДЕМЕЙМІН деп қате жазғаны кездейсоқ емес, әдейі жасалған әрекет еді. Бәріміз бұл суреттің репостын жасап осы үміткерге жарнама жасай бастаппыз!” – деп жазды ол.
Басым қазақтілді электорат мұндай қателік жіберетін кандидаттарға дауыс бермеуі мүмкін, сондықтан кандидаттарға үгіт-наасихат материалдарын жасау кезінде мұқият болу маңызды.
