Fox News хабарлағандай, есепте банк жазбаларының скриншоттары бар.
Өкілдер палатасының қадағалау комитетінің төрағасы Джеймс Комер сәрсенбіде Байдендер отбасының шетелдік бизнес мәмілелері туралы үшінші меморандум жариялады. Ол Хантер Байден мен оның іскер серіктестерінің оның әкесі вице-президент болып тұрған кезде ресейлік және қазақстандық олигархтардан миллиондаған төлемдер алғанын көрсетеді, деп хабарлайды Qaz365.kz тілшісі Fox News-ке сілтеме жасап.
Түзетілген банк жазбаларының скриншоттары берілген 19 беттік меморандумда миллиондаған төлемдер украиндық Burisma Holdings мұнай-газ холдингі, сондай-ақ ресейлік олигарх Елена Батурина мен қазақстандық олигарх Кеңес Рақышевтен келгені және сол кездегі вице-президент Байденнің Батуринамен, Рақышев және Бурисмадан келген өкілмен кешкі асқа қатысқаны айтылады.
«Сол кездегі вице-президент Байден бұл адамдармен немесе олардың өкілдерімен жеке, айтарлықтай уақыт аралығында кездесті. Ол кездегі вице-президент Байден Хантер Байденнің шетелдік бизнес серіктестерімен динамик арқылы шамамен 20 телефон қоңырауына қосылды және Хантер Байденге қомақты ақша төлеген шетелдік олигархтармен кешкі асқа қатысты», – делінген меморандумда.
Еске сала кетейік, Рақышев қазақстандық кәсіпкер, Fincraft Group холдингінің президенті, Net Element, Fastlane Ventures директорлар кеңесінің мүшесі, Singulariteam негізін қалаушылардың бірі. Forbes журналының «Қазақстанның ең бай бизнесмендерінің ТОП-50», «Қазақстанның ең ықпалды бизнесмендерінің ТОП-50» тізімдеріне енген. Сондай-ақ ол ҰҚШҰ бас хатшысы Иманғали Тасмағамбетовтың қызы Әсел Тасмағамбетоваға үйленген.
