Депутаттар көп әйел алғандарды және жеке басты анықтауға кедергі келтіретін киім кигендерді (паранжа) жауапкершілікке тартуды қарастыратын заң қабылдады
Өзбекстанда депутаттар көп әйел алғандарды және жеке басты анықтауға кедергі келтіретін киім кигендерді (паранжа) жауапкершілікке тартуды қарастыратын заң жобасын қабылдады, деп хабарлайды Qaz365.kz.
Сондай-ақ, екі немесе одан да көп әйелмен тұруды насихаттайтын, әйел мен ердің тең құқығын ашық түрде жоққа шығаратын азаматтар әкімшілік жауапқа тартылуы мүмкін.
"Екі және одан да көп әйелмен бірге тұруды насихаттаушыларға, әйелдер мен ер адамдардың тең құқықтарын ашық түрде жоққа шығарғуға әкімшілік жауапкершілік қарастырылған", – делінген құжатта.
Діни неке қию рәсімін жасап, алайда заңды түрде некеге тұрмағандарға да жауапқа тартылады. Одан бөлек заң қоғамдық орындарда жеке тұлғаны тануға кедергі келтіретін киімге (паранжа) тыйым салады. Дегенмен медициналық нұсқаулық негізінде немесе жұмысына байланысты бетін жабатын, бірақ жеке басты анықтауға кедергі келтірмейтін жағдайлар ескерілген: жол жүрісі қауіпсіздігін қамтамасыз етуге арналған арнайы бас киімдер немесе спорттық және мәдени-бұқаралық іс-шаралар кезінде және заңмен рұқсат етілген киімдер.
Депутаттардың мәлімдеуінше, заң жобасы ұлтаралық келісімді, діни төзімділікті және әйелдер мен балалардың құқықтарын қорғауды одан әрі нығайтуға, сондай-ақ қоғамдық тәртіпті сақтау жөніндегі күш-жігердің тиімділігін арттыруға қызмет етеді.
