Астанада белгілі блогер Ерболат Жанабылов пен оның жұбайы Эльмира Төлегеноваға қатысты қылмыстық істі қарау аяқталды. Бастапқыда айыптау тарапы ерлі-зайыптыларды колонияға нақты мерзімге қамауды сұрағанымен, қорытынды үкім әлдеқайда жеңіл болды. Сот олардың кінәсін толық мойындап, өкінгенін, балаларының бар екенін және шығынды толық өтегенін ескерді, деп хабарлайды Qaz365.kz.
27 сәуірде судья Әділбек Баймаханов айыпталушылардың прокуратурамен мәмілеге келуінің арқасында мүмкін болған үкімді жариялады. Егер жарыссөз кезінде мемлекеттік айыптаушы 4 жылға бас бостандығынан айыруды талап етсе, үкім оқылар сәтте бұл ұстаным жұмсартылған жаққа қарай күрт өзгерді.
Сот шешіміне сәйкес, ерлі-зайыптылар заңсыз кәсіпкерлікпен айналысқаны және қылмыстық жолмен алынған ақшаны заңдастырғаны үшін кінәлі деп танылды.
Ерболат Жанабылов 2 жылға шартты түрде бас бостандығынан айырылды. Сот ҚР ҚК-нің 63-бабын қолдана отырып, оны қоғамнан оқшауламай-ақ түзелуге болады деп шешті.
Эльмира Төлегенова қауіпсіздігі барынша төмен мекемеде 2 жылға бас бостандығынан айыру жазасын алды. Алайда ол колонияға жақын арада бармайды: кәмелетке толмаған балаларының болуына байланысты жазаны өтеу 2 жылға шегерілді.
Бұл істе мүлікті тәркілеу мәселесі ерекше қызығушылық тудырды. Люкс көліктерге құмарлығымен танымал блогерлер коллекциясының едәуір бөлігінен айырылды, бірақ ең қымбат көліктерін сақтап қалды.
«Сот шешімімен мемлекет пайдасына 8 автокөлік пен 17 ұялы телефон тәркіленді. Сонымен қатар келтірілген шығынның толық өтелуіне байланысты Lamborghini Urus және Lexus LX600 маркалы автокөліктеріне қойылған тыйым күшін жойды», – деді судья Әділбек Баймаханов.
Тергеу анықтағандай, Жанабылов пен Төлегенова тиісті тіркеусіз және лицензиясыз кәсіпкерлікпен айналысып, аса ірі мөлшерде табыс тапқан. Олар алынған қаражатты түрлі конверсиялар мен депозиттік шоттар арқылы заңды айналымға қосып, «жуып отырған».
Сот іс-әрекеттерді келесі баптар бойынша саралады:
214-бап – тіркеусіз кәсіпкерлік қызметпен айналысу, бұл аса ірі мөлшерде табыс алумен ұласқан.
218-бап – алдын ала сөз байласу арқылы адамдар тобымен қылмыстық жолмен алынған ақшаны заңдастыру.
Сот кінәні мойындауды, шығынды ерікті түрде өтеуді және бұрын сотты болмағанын жеңілдетуші жағдайлар деп таныды. Іс бойынша ауырлататын мән-жайлар анықталған жоқ. Тараптардың үкімге наразылық білдіруіне 15 тәулік уақыты бар.
