Кітап әлемдегі этникалық қазақтар туралы зерттеу жүргізгісі келетін мамандарға арналған
Жас журналист Қадірәлі Сарыпбектің «Жат жұрттағы қазақтардың өмірі мен тағдыры» атты шетелдегі қазақтар туралы кітабы жарық көрді. Кітапқа автордың Qaz365.kz сайтына шыққан көптеген мақалалар жинағы да топтастырылған.
Аталмыш кітап автор сөзі мен өмірбаянынан басталып, келесі бес бөлімді қамтиды. Әрбір бөлімде шетелдегі қазақтардың сұхбаттары мен суреттері басылған.
«Ауған қазақтарының қилы тағдырлары және мұң-мұқтаждары» бөлімінде Ауғанстан еліндегі этникалық қазақтардың проблемалық мәселелері мен олардың атажұрттан қоныс аударғандағы тарихы туралы мақала мен сұхбаттар түрінде баяндалған.
«Пәкістан қазақтарының қиындыққа толы күнкөрісі» бөлімі құжаты жоқ қандастардың осы елдегі күн көрістерін баяндап, қиындыққа толы өмірлерін суреттеген.
«Иран қазақтарының атажұртқа оралуындағы кедергілер» бөлімі Иран ислам республикасындағы этникалық қазақтардың жай-күйіне тоқталып өткен.
«Қаймағы бұзылмаған Моңғолия жеріндегі қазақтар» осы елдегі қандастарымыздың салт-дәстүрі, ана тілдерін сақтауы атамекендегі ағайыннан артық болмаса, кем емес. Өзге елдің әр жерінде қоныс аударып, өмір сүріп жатқан қазақ бауырларымыз туралы жазылған.
«Қарт құрлықтағы қазақтардың тіршілігі мен бақ дарыған өмірі» бөлімі Еуропа мемлекеттері мен алпауыт әлем елдеріндегі қазақтар туралы жазылған. Олардың саяси көзқарастары, күнделікті қым-қуыт тіршілік жайлары көрініс тапқан.
«Кітапты басып шығаруға Мемлекеттік сыйлықтың лауреаты, Қазақстанның еңбек сіңірген қайраткері Сәрсебеков Ертай Қожахметұлы ақыл-кеңесін беріп, өмірлік тәжірибесімен бөлісті. Ол кісіге шынайы ризашылығымды білдіріп, үлкен алғысымды жеткізгім келеді», - дейді 28 жастағы автор.
Кітап әзірге санаулы данамен жарық көрген. Кітап әлемдегі этникалық қазақтар туралы зерттеу жүргізгісі келген сала мамандарына және қалың оқырман қауымға арналған. Автор осы бағытта бірге серіктестік орнатып, қандай да бір сұрақтар бойынша байланыс орнатуға дайын екендігін жеткізеді.
