Көліктің құрылымы мен рулі де қайта өңделген пластиктен жасалды
Сәтбаев Университеті Энергетика және машина жасау институтының студенттерінен құралған SU Racing Team командасы жарысқа арналған және энергия үнемдегіш автомобильдерді құрастыру бойынша беделді «Қауіпсіздік сыйлығына» ие болып, Asian Shell Eco Marathon 2024 халықаралық марафонынан жеңіспен оралды, деп хабарлайды Qaz365.kz.
Жарыс Индонезияның Ломбок аралында, Мандалика халықаралық трассасында өтті.
Asian Shell Eco Marathon – Азия-Тынық мұхиты аймағы мен Таяу Шығыстың түкпір-түкпіріндегі ең үздік студенттік командаларды біріктіретін ауқымды іс-шара. Қатысушылар энергия үнемдегіш инновациялық көліктердің жобасын жасап, оларды құрастырады. Биылғы жылы марафонға 13 елден 120 команда қатысты, ал Сәтбаев Университетінің Racing Team командасы қауіпсіздікті қамтамасыз етуді талап ете отырып, жеңімпаздар қатарынан көріне білді.
«Біздің команда дайындық барысында және жарыстың барлық кезеңдерінде қауіпсіздік шараларына үлкен мән берді. Автотұрақта үнемі сақталатын тазалықтан бастап, барлық техникалық бөлшектерді егжей-тегжейлі бақылауға дейін – осының бәрі Сәтбаев Университеті Racing Team командасына танымал болып, «Қауіпсіздік сыйлығы» номинациясында жеңіске жетуге мүмкіндік берді», – делінген университет хабарламасында.
Әсіресе біздің студенттердің қайта өңделген пластиктен салпыншақ жасау бастамасы ерекше атап өтілді. Марафонға қатысушылар бөтелке қақпақтарын жинап әкеліп, олар сол жерде қайта өңделді, сөйтіп олардан Shell логотипі бар салпыншақтар жасалды. Бұл идея көпшіліктен қолдау тауып, қатысушылар арасында нағыз хитке айналды.
Көліктің құрылымы мен рулі де қайта өңделген пластиктен жасалды. Жігіттер тіпті қайта өңделген материалдардан мотор басып шығарды. Жол бойында бұл бізге мінсіз нәтиже бермесе де, оны жақсарту бойынша жұмысты әрі қарай жалғастырамыз.
Алынған 3000 АҚШ доллары көлеміндегі ақшалай сыйлық экологиялық бастамаларды одан әрі дамытуға жұмсалады. Satbayev University Racing Team командасы еліміздің автомобиль өнеркәсібіне қауіпсіздік пен экологиялық инновацияларды ілгерілетуге қосып отырған үлесін мақтан тұтады.
