Сотта саусақ іздерінің нәтижесі оқылды
Астанада бұрынғы министр Қуандық Бишімбаев пен оның туысы Бақытжан Байжановқа қатысты қылмыстық іс бойынша сот процесі жалғасып жатыр. Іс материалдарын зерделеу аясында жаңа мән-жайлар анықталды, деп хабарлайды Qaz365.kz.
Заңгер Назкен Құсайынова №1 VIP кабинкадан табылған заттарға жүргізілген саусақ іздерінің нәтижесін оқыды. Атап айтқанда, ол жерден скотч табылды. Қуандық Бишімбаевтан жауап алу кезінде айыптаушы тарап скотчқа қатысты сұрақ қойды. Ал Бишімбаев оны көрмегенін және қолын тигізбегенін «мүмкін жұмысшылар тастап кеткен шығар» деп түсіндірді.
Бірақ сараптама скотч қиындыларында Бишімбаевтың өзінің де, Байжановтың да саусақ іздері түскенін көрсетті.
Еске сала кетейік, Астана қаласының қылмыстық істер жөніндегі ауданаралық сотында экс-министр Қуандық Бишімбаевтың ісі бойынша сот отырысы бірнеше күнннен бері өтіп жатыр. Оған «қинау» (110-баптың 2-бөлігі) және «аса қатігездікпен адам өлтіру» (99-баптың 2-бөлігі) баптарымен айып тағылған. Бұған қоса, Астанадағы «Гастро-орталық» директоры, Бишімбаевтың туысы Бақытжан Байжанов Салтанат Нүкенованың өліміне байланысты іс бойынша "қылмысты жасырды" деген күдікпен сотқа тартылып жатыр.
