Әкім орынбасары жағдайдан хабардар екенін жеткізген
Әлеуметтік желіде айтыскер ақын Біржан Байтуов Түркістан облысы Төлеби ауданында орналасқан «Тау самалы» демалыс аймағындағы нысанның кескініне шүйлікті, деп хабарлайды Qaz365.kz.
Қазақы, қастерлі мекен Түркістан облысының ең шырайлы өлкесі Төлеби ауданының қақ төрінде, бүкіл туристер келіп тамашалайтын «Тау самалы» демалыс аймағының ең биік нүктесінде тұр. Оңтүстіктің тұмса табиғатын тамашалаймын деп қанатты жолмен тау биігіне шыға қалсаң тура бір Мәскеуге барғандай әрі-сәрі күйде қаласың. Бұл не сонда? Құлдық сана ма? Әлде есер ессіздік пе? Жауабын білер облыс орталығында құрықты қызметкер, құзырлы орган бар ма? Облыстың идеологиясына жауапты Ертай Алтаев (Түркістан облысы әкімінің орынбасары – ред) мырза, бұл жағдайдан хабарыңыз бар ма?- деп жазды Байтуов.
Әкім орынбасары бұл сауалға жағдайдан хабардар екенін жеткізген.
Төлеби ауданы Нысанбек елді мекенінде орналасқан «Тау самалы» демалыс орны жеке кәсіпкерлік нысаны болып саналады. Нысан 18 жылдан бері жұмыс істеп келеді. Маған берген ақпаратқа сәйкес аталған демалыс орнының тау бөктерінде орналасқан осы ғимаратының және «Бәйтерек» монументінің көшірмелері 2014 жылы туристерді тарту мақсатында салынған. Ол жерде тек Мәскеудің ғимараты тұрған жоқ. Тәуелсіз Қазақстанның сәулеттік символына айналған «Бәйтерек» монументі де орналасқан. Әлем бойынша осыған ұқсас дүниелер көп. Туристерді қызықтыру үшін әлемге әйгілі ғимараттар мен ескерткіштердің, әлемнің жеті кереметінің макеттерін орнату – әлемде бар үрдіс. Алдағы уақытта Төлеби ауданына іссапармен баруды жоспарлап отырмын. Сапар барысында осы нысанды көріп, танысып қайтатын боламын. Бұл нысан жеке кәсіпкерге тиесілі екенін еске саламыз. Заң аясында жұмыс жүргіземіз, – дейді Ертай Алтаев.
