Telegram мессенджерінің негізін қалаушы Павел Дуров Digital Bridge 2025 форумына қатысу үшін Қазақстанға келеді
Бұл туралы цифрлық даму, инновациялар және аэроғарыш өнеркәсібі министрі Жаслан Мадиев Instagram-парақшасында хабарлады, деп жазады Qaz365.kz.
Telegram платформасының негізін қалаушы әрі CEO-сы Дуров Digital Bridge 2025 аясындағы пленарлық отырысқа қатысады. Іс-шара 2 қазанда Астанада Қазақстан Президентінің қатысуымен өтеді.
Дуровтан бөлек, технология саласындағы әлемдік жетекші сарапшылар да сөз сөйлейді. Олар: Омар Султан Аль-Олама (БАӘ жасанды интеллект, цифрлық экономика және қашықтан жұмыс істеу жөніндегі мемлекеттік министрі), Илья Стребулаев (Стэнфорд профессоры), Кай-Фу Ли (Sinovation Ventures компаниясының негізін қалаушы әрі бас директоры) және Питер Норвиг (Стэнфорд ғылыми қызметкері, Google компаниясының зерттеу жөніндегі директоры).
Пленарлық отырыстың модераторы Solana Foundation президенті Лили Лю болады.
Сонымен қатар, 2 қазанда үздік AI-жобаларға арналған Generative Nation Pitch республикалық питч-сессиясы өтеді. Финалға өткен қатысушылар өздерінің жобаларын халықаралық сарапшыларға, инвесторларға және мемлекеттік органдар өкілдеріне таныстырады.
