Алайда Премьер-министрдің орынбасары қай басылымды меңзегенін айтпады
Қанат Бозымбаев ұшақ апаты кезінде адамдардың денесін ашық көрсеткендерді айыптады, деп хабарлайды Qaz365.kz.
Алайда Премьер-министрдің орынбасары қай басылымды меңзегенін айтпады.
Вице-премьердің айтуынша, ұшақ апатқа ұшырағаннан кейін денелердің фрагменттері бар бейнежазбалар желіге тарап кеткен.
– Мен әлеуметтік желіні қарап отырып, қатты наразы болдым. Біздің танымал басылымдарымыздың бірі трагедия орнында денелердің шашылып жатқанын көрсеткен бейнені жариялады. Өтініш, этиканы ұстаныңыз, өйткені бұл қайғыны бастан өткерген туыстары мен жақындары көруі мүмкін. Кейбір журналистер денелердің фрагменттерін көрсету арқылы хайппен ақша тапқысы келеді – ол денелер өртенген, бүлінген. Әрине, сіз қаралымды көбейтресіз, бірақ марқұмдардың мыңдаған туысы мен жақындарының құқықтары мен психикасын құрметтеңіз. Менің ойымша, біз бұл мәселемен ертеңнен-ақ айналысатын шығармыз және мұндай басылымдарға құқықтық баға беріледі, – деді вице-премьер.
Еске сала кетейік, кеше Ақтау маңында Әзербайжанның ұшағы апатқа ұшыраған еді. Шетел азаматтарымен бірге Қазақстанның бес азаматы опат болды. Олардың тізімін ТЖМ жариялады.
