Сотталушының кінәсі жәбірленушінің айғақтарымен, сараптама қорытындысымен және басқа да айғақтармен дәлелденді
Атырау облысының Мақат ауданын басқарып тұрғанда әйелін ұрды деген дзюдоист Ринат Ибрагимовқа қатысты сот үкімі шықты, деп хабарлайды Qaz365.kz.
Сотта анықталғандай, 2023 жылғы 31 мамырда Атырау қаласындағы пәтерінде сотталушы мен оның әйелі арасында жанжал болған.
“Экс-әкім жәбірленушінің өзіне материалдық тәуелділігін пайдаланып, осының негізінде жанжал шығарып, әйелінің оң иығынан ұстап, есікті жауып, бөлмеге кіргізген. Ешкімнің кедергі жасамайтынына көз жеткізіп, денсаулығына қасақана зиян келтіру мақсатында оны еденге құлатқан және сол жақ санынан бірнеше рет тепкілеген. Соның салдарынан жәбірленушінің 5-ші омыртқасы сынып, орташа ауырлықта зақым алған”, – делінген іс материалдарында.
Сотталушының кінәсі жәбірленушінің айғақтарымен, сараптама қорытындысымен және басқа да айғақтармен дәлелденді.
“Сотпен жаза түрін таңдау кезінде Ринат Ибрагимовтің бұрын соттылығы жоқтығы, мінезі оң сипатталғаны ескерілді. Сот үкімімен оған 2 жылға бас бостандығын шектеу жазасы тағайындалды”, – делінген хабарламада.
Сондай-ақ жәбірленушінің 20 млн теңге моральдық шығын өндіру туралы азаматтық талап қоюы ішінара қанағаттандырылып, экс-әкім бұрынғы әйелінің пайдасына 2 млн теңге моральдық зиянды өтейтін болды.
Айта кетейік, Ринат Ибрагимовті көпшілік спортшы ретінде де жақсы біледі. Ол бірнеше жыл дзюдо күресінен ұлттық құрамада өнер көрсетіп, екі рет Олимпиадаға қатысқан, ал соңғы жылдары билік тізгінінде жүр.
