Өрт сөндіру бөлімшелерін салу тәсілі қайта қаралған
Төтенше жағдайлар министрі Шыңғыс Әрінов халық көп жиналатын объектілерді ТЖМ қызметкерлері қабылдау керек деп санайды, деп хабарлайды Qaz365.kz.
«Көп қабатты тұрғын үйлер мен адамдар көп жиналатын объектілерді пайдалануға қабылдау өкілеттіктерін министрлікке беру мәселесін шешудеміз», - деді министр Үкімет отырысында.
Шыңғыс Әріновтың айтуынша, министрлік елдегі өрт қауіпсіздігін қамтамасыз ету шаралары кешенін жүргізуде.
Төтенше жағдайларға жедел ден қою мен министрлік бөлімшелерінің жауынгерлік әзірлігін күшейтуде Ақмола облысында пилоттық жобада өрт сөндірушілерден, дәрігерлер мен құтқарушылардан тұратын әмбебап бөлімше құрылды. Бұл зардап шеккендерді жедел түрде кешенді құтқару мен оларға алғашқы көмек көрсету мүмкіндігін береді.
Сонымен қатар өрт сөндіру бөлімшелерін салу тәсілі қайта қаралған. Нақтырақ айтқанда, тамыз айынан бастап Астанада 3,5 айдың ішінде жылдам тұрғызылатын конструкциялардан салынған өрт сөндіру бөлімшесі жұмыс істейді. Барлық өңірлерде құрылыстың осындай тәсілі енгізілетін болады. Жалпы, біздің елімізге 121 өрт сөндіру депосы қажет.
