Вайнерлер қаржы пирамидасын құрды деп айыпталған болатын
Алматыда Mudarabah Capital қаржы пирамидасын ұйымдастырушыларға қатысты сот үкімі шықты. Сот қаулысы бойынша вайнерлер Мейіржан Төребаев пен Мейірхан Шерниязов бес жылға бас бостандығынан айырылды, деп хабарлайды Qaz365.kz.
Соттың хабарлауынша, Төребаев пен Шерниязовтан басқа сотталушылардың барлығы Қылмыстық кодекстің екі бабы бойынша кінәлі деп танылды. Атап айтар болсақ, 217-бап - «қаржы пирамидасын құру және басқару» және 262-бап - «ұйымдасқан топ, қылмыстық ұйым құру және басқару».
Ал вайнерлер тек 217-бап бойынша кінәлі деп танылды. Сот үкімімен күдіктілерге бас бостандығынан айырудың түрлі мерзімдері тағайындалды.
«Мейіржан Төребаевқа ең төменгі қауіпсіздік колониясында бес жыл бас бостандығынан айыру жазасы тағайындалсын. Мейірхан Шерниязов ең төменгі қауіпсіздік колониясында бес жыл жазасын өтесін», – делінген сот қаулысында.
Айта кетейік, қаржы пирамидасын құрды деп айыпталған танымал вайнерлердің ісі былтыр 12 желтоқсанда сотқа жолданған еді.
