Ол Жәнібекті асырап алу үшін ақша төледім деп отыр
Биологиялық анасын іздеп жүрген Жәнібек Савельев Бельгиядағы асырап алған анасы Валеримен сұхбаттасып, желіде оқырмандары жолдаған сауалдарға жауап алды, деп хабарлайды Qaz365.kz.
«Бельгияда танысқан келіншек арқылы Арқалықтағы балалар үйіне хабарластым. Балалар үйі асырап алуға Жәнібекті, яғни сені ұсынды. Мен Қазақстанға келмей тұрып, Бельгияда жүргенімде Жәнібектің жалғыз фотосы мен мәліметтерді алдым. Одан кейін Арқалыққа жеттім. Балалар үйіне барғанымда Жәнібекті танымайтын адам кейпін таныттым. Қай баланы асырап алатынымды біліп келсем де, өтрік таңдап жүрдім. Өйткені маған солай істе деп айтты», - дейді Валери.
Оның айтуынша, Бельгиядан алдымен Алматыға келген. Сосын Астанаға жеткен. Ал Астанадан Арқалыққа екі ер адам көлікпен апарған.
«Қазақстандағы қай балалар үйінен бала асырап алсам деген таңдайтын мүмкіндік болған жоқ. Бірақ қандай баланы қалайтынымды айттым. Яғни 2-3 жастан аспаған ұл бала болу керек дедім», - дейді Жәнібектің асырап алған анасы.
Ол Жәнібекті асырап алу үшін 12 мың доллар төледім деп отыр. Сол жерде Америкадан келгендер де болған. Олар 20 мыңнан төлепті.
«Ақшаны мен ағылшын тілінде сөйлейтін жалғыз адамға бердім. Ол Арқалықтағы балалар үйіне жақын тұрды. Сондықтан мен онымен жақын байланысты болдым. Одан кейін сөйлеспедік. Тек Жәнібек 12-13 жаста болғанда көбірек мәлімет білгім келіп, ол әйелге электрондық пошта арқылы өзім хабарластым. Бірақ көмектеспеді. Жәнібекті агенттіктер арқылы емес, делдалдың көмегімен асырап алдым», - дейді ол.
Барлық құжаттарды дайындау үшін Қазақстанда екі ай жүрген.
