Жаңаөзен қаласында ҚМГ арнайы жұмыс тобы тексеріс жүргізуді жалғастырып жатыр
«Өзенмұнайгаздың» қаржы-шаруашылық қызметінде 160 заң бұзушылық анықталды. Бұл жайында «ҚазМұнайГаз» ұлттық компаниясынан мәлім етті, деп хабарлайды Qaz365.kz тілшісі «Қазмұнайгаз» Ұлттық компаниясының баспасөз қызметіне сілтеме жасап.
Компания мәліметінше, Жаңаөзен қаласында ҚМГ арнайы жұмыс тобы тексеріс жүргізуді жалғастырып жатыр. Қазіргі уақытта 55 шаруашылық қызмет нысаны, оның ішінде «Өзенмұнайгаз» АҚ-тың 17 өндірістік құрылымдық бөлімшесі, 8 мұнай сервис ұйымы мен 30 басқа да мердігер ұйымның қызметі талданды.
ӨМГ-нің қаржы-шаруашылық қызметін тексеру кезінде алдын ала 160 бұзушылық пен сәйкессіздік анықталды. Оның ішінде 7 факті ҚР заңнамасына сай шаралар қабылдау үшін құқық қорғау органдарына жіберілді. 10 факті бойынша қызметтік тергеу жүріп жатыр. 101 факті бойынша жауапты тұлғаларға тәртіптік жаза қолданылатын болады.
Құқық бұзушылық фактілерінің салдарынан келтірілген шығын сомасы процессуалды және регламенттеуші іс-шаралардың қорытындысы бойынша анықталады.
«Біз құқық қорғау органдарымен тығыз жұмыс істеп, заңға қайшы анықталған әрекеттер жайлы дер кезінде хабарлап отырмыз. Бұдан әрі олар тергеу жүргізіп, өзге іс-шараларды қолға алады. Солардың біріне кеше Экономикалық тергеу департаментінің «Өзенмұнайгаз» бас директорының орынбасарын ұстау фактісі де жатады. Комиссияның жұмысы әлі аяқталмады, көптеген факт бойынша қызметтік тергеулер жүріп жатыр», - деді арнайы жұмыс тобының жетекшісі, ҚМГ Басқарма төрағасының орынбасары Дәулетжан Хасанов.
