Екі медицина қызметкері - бөлім басшысы мен психиатр әзірге қызметінен шеттетілді
Балалардың улану оқиғасынан кейін Қарағанды облысының арнаулы әлеуметтік қызмет көрсету орталығының 10 қызметкері қайтадан өз жұмысына кірісті. Бұл туралы Денсаулық сақтау вице-министрі – Бас мемлекеттік санитариялық дәрігер Айжан Есмағамбетова айтты, деп хабарлайды Qaz365.kz.
Бас санитар дәрігер Айжан Есмағамбетова облыс әкімі орынбасарының жетекшілігімен 10 тамыз күні Қарағанды облысы бойынша арнаулы әлеуметтік қызметтер көрсету орталығында балалардың жаппай улану фактісін тексеру үшін комиссия құрылғанын айтты.
"Кеше комиссия шешім шығарды, 10 медицина қызметкері осы медициналық-әлеуметтік мекемеде тікелей қызметіне қайтарылды. Екі медицина қызметкері - бөлім басшысы мен психиатр әзірге қызметінен шеттетілді", – деді Айжан Есмағамбетова.
Еске салсақ, 30 шілдеде Қарағанды облысының Балаларға арнаулы әлеуметтік қызмет көрсету орталығында бірнеше бала уланып, олардың біреуі қаза тауып, алтауы жансақтау бөліміне жеткізілді.
Қазақстан Республикасының Денсаулық сақтау министрі Ажар Ғиният осы жағдайға байланысты Қарағандыға барды.
Бас прокуратура осы іске қатысты ҚР ҚК-нің 304-бабының 2-бөлігі (ауыр зардаптарға әкеп соқтырған санитарлық ережелерді немесе гигиеналық нормативтерді бұзу) бойынша сотқа дейінгі тергеу басталғанын хабарлады.
Тамыз айының басында Сотқа дейінгі тергеу аяқталғанға дейін тексеру кезінде орталық директорының міндетін атқарушы және осы орталықтың 12 медицина қызметкері жұмыстан және өз міндеттерін орындаудан шеттетілді.
Денсаулық сақтау министрі Ажар Ғиният хабарлағандай, дәрігер мамандар балалар токсикалық заттан қатты улануы мүмкін екенін айтып отыр.
