Ол 38 жастағы қала тұрғыны болып шықты
Қарағандыда облыстық балалар ауруханасының екі дәрігерін ауыр соққыға жықты деген күдікпен ер адам ұсталып, қамауға алынды, деп хабарлайды Qaz365.kz.
Оқиға 12 маусым күні медициналық мекеме аумағында болған. Алдын ала мәлімет бойынша, 38 жастағы қала тұрғыны мен медицина қызметкерлері арасында жанжал шығып, соңы дәрігерлерге шабуыл жасауға ұласқан. Кейін белгілі болғандай, күдікті ауруханадағы науқастардың бірінің туысы болып шықты.
Зардап шеккен дәрігерлер ауыр жарақат алып, шұғыл нейрохирургия бөліміне жатқызылды. Денсаулық сақтау министрі Ақмарал Әлназарова ауруханаға арнайы барып, олардан жағдайын сұрап, бұл әрекетті бассыздық деп атап, қатаң айыптады.
Қарағанды облыстық полиция департаментінің мәліметінше, күдікті уақытша ұстау изоляторына қамалып, сот шешімімен екі айға қамауға алынды. Қылмыстық іс бойынша тергеу амалдары жалғасуда.
