Мейрамхана бұрындары қазақша ән қоспайтын еді
Қазақша әндер қоспаймыз деген “Пинта” мейрамханалар желісі өз ұстанымын өзгертті, деп хабарлайды Qaz365.kz.
Желіде мейрамхананың әншілермен чатынан скриншоттар тараған болатын. Онда әншілерге мейрамханада қазақша ән айтуға болмайтыны жазылған. Егер қонақтар қазақша ән сұраса, репертуарда қазақша ән жоқ екенін айтуды немесе менеджерді шақыруды ұсынған.
Ал қазір мейрамхананың Instagram парақшасында барлық ақпарат бірінші мемлекеттік тілде, содан кейін барып орыс тілінде беріледі. Сондай-ақ stories-тен қазақша әндердің шырқалып жатқанын байқауға болады.
Cонымен қатар мейрамхана желісі екі тілде де қызмет көрсететіні жайлы бөлек жазба жариялады.
“Құрметті достар, ПИНТА мейрамханалар желісі нарықта 2008 жылдан бері жұмыс істеп келеді
Қонақпен және қызметкерлермен барлық ішкі және сыртқы байланыс қазақ және орыс тілдерінде жүргізіледі, атап айтқанда: мәзір, мейрамханадағы қызмет, жарнамалық құралдар, әлеуметтік желілердегі жариялымлар және оқыту құралдары.
Әр жұма және сенбі күндері барлық мейрамханаларда музыкалық ойын-сауық бағдарламасы өткізіліп, онда қаланың үздік музыканттары мен dj-лері өнер көрсетіп, қазақ тіліндегі танымал әуендерді де орындайды!
Біз сізді мейрамханаларымызда көруге әрқашан қуаныштымыз!” – делінген жазбада.
