Патриотизмнің жаңа белгісі мен символына айналды
Республика күніне орай Шымкентте қаланың қай түкпірінен қараса да, анық көрінетін жаңа символ пайда болды, деп хабарлайды Qaz365.kz.
Shymkent City шағын ауданында биіктігі 100 метрлік ту бағанасында Мемлекеттік Ту салтанатты түрде көтерілді. Көлемі 30×15 метрлік үлкен ту қаланың ең биік нүктесінде желбіреп, патриотизмнің жаңа белгісі мен символына айналды.
“Tulip Hall орталығының жанына тутұғыр орнатылды. Енді бұл жер жаңа көрнекті орынға айналды. Жаңа тутұғырдың биіктігі Ордабасы алаңындағы 50 метрлік тутұғырдан едәуір биік. Бұл Шымкент қаласының серпінді дамуын және қаланың жаңа биіктерге ұмтылуын көрсетеді”, – делінген Шымкент қаласы әкімінің баспасөз қызметінің хабарламасында.
Шымкент тұрғындары мен қонақтары атап өткендей, биікке көтерілген ту халықты бір тудың астына біріктіре отырып, ерекше бірлік пен мақтаныш сезімін тудырады.
