Үйдегі жанжал әйел тілінің ұзындығынан туындайды - Мәжіліс депутаты дау тудыратын мәлімдеме жасады

Мәжілісте тұрмыстық зорлық-зомбылық мәселелеріне арналған заң жобасы таныстырылды. Жиын барысында депутат Анас Баққожаев отбасындағы жанжалдардың туындауына әйелдердің де кінәсі бар деп отыр, деп хабарлайды Qaz365.kz. 

«Еркектің ер сорлысы ғана әйел адамға қол көтереді. Дегенмен, ұрыстардың барлығы ұрудан шықпайды ғой. Кішкене ерлерді де түсінуіміз керек. Басында жанжал туындайды. Сол жанжал неден туындайды? Әрине, әйелдің тілінің ұзындығынан. Әйел адамдар мені кешірсін. Бірақ ондай да фактілер бар. Қазақта «Жақсы әйел – ырыс, жаман әйел – ұрыс» дейді, болмаса “Ерге жаққан әйел елге де жағады” дейді. Біз қазақы тәрбиеден алшақтап бара жатырмыз», – деді депутат.

Осыған орай ол үкіметтік органдарға сауал қойды.
«Қазіргі таңда оқу орындарында қыз балаларды инабаттылыққа, ибалылыққа тәрбиелейтін қандай сабақтар өткізіліп жатыр? Сондай ынталандыру шаралары бар ма?» – деп сауал тастады Анас Баққожаев.

Оқу-ағарту вице-министрі Еділ Оспан ұлттық мәдениетті оқыту оқу пәндерінің барлығында бар екенін айтты.
Айта кетейік, бұған дейін Асхат Аймағамбетов Үкімет харассмент туралы норманы алып тастағанын мәлімдеген.
Ал Мәжіліс депутаты Ерлан Сайыров Әлихан Смайыловтың министрлер кабинеті не себепті отставкаға кеткенін айтқан болатын.